Abstract:

Məqalənin yazılmasında əsas məqsədlərdən biri heç şübhəsiz ki, elm və din (İslam) arasında heç bir ziddiyyətin olmadığını göstərmək, elmin əhəmiyyətini həzrət Peyğəmbərin gətirdiyi dinin tələbləri nöqteyi-nəzərindən izah edib aydınlaşdırmaq, uzun illər Sovet dövründə ölkəmizdə və dünyada dinə (xüsusilə də İslama) qarşı aparılmış əsassız mübarizənin müasir dövrdə əhəmiyyətsiz olduğunu bildirməkdir. Çünki İslam mədəniyyətinin hər tərəfli öyrənilməsi, İslamın mahiyyətinin açılıb göstərilməsi müasir ictimai həyatın aktual məsələlərindən olmaqla bərabər, həm də İslamla elmin vəhdət təşkil etdiyinin elmi şəkildə əsaslandırılması dinşünasların ən əsas vəzifələrindən biridir. Məlum olduğu kimi, İslam elmləri orta əsrlərdə Yunan mədəniyyəti və fəlsəfəsi ilə birlikdə müsəlmanlar vasitəsilə Avropa ölkələrinə ötürülmüşdür. Orta əsrlərdə meydana gələn İslam mədəniyyəti və bu mədəniyyətə xidmət edən müsəlman alimləri dünya elminə olduqca böyük töhfələr vermişlər. İstər humanitar, istərsə də dəqiq elmlər sahəsində dünya elminə yeniliklər gətirən müsəlman alimlərinin yetişməsində şübhəsiz ki, ilahi elmin qaynağı olan Qurani-Kərimin xüsusi rolu olmuşdur. Qurani-Kərimin gətirdiyi yeni İslamın yaratdığı mədəniyyəti doğru başa düşmək üçün ilkin olaraq onu dini nöqteyi-nəzərdən təhlil etmək lazımdır.

Keywords: